Mazkur maqolada jismoniy shaxslarning fuqarolik-huquqiy munosabatlarda normal holatda ishtirok etishini ta’minlovchi yuridik mezonlar tahlil qilinadi. Muallif tomonidan ushbu yuridik mezonlar to‘rt guruhga bo‘lib o‘rganilgan. Maqolada huquq sub’ektliligining kategoriyalari bo‘lgan huquq layoqati va muomala layoqati, delikt layoqat, shaxs o‘z harakatlarini amalga oshirish jarayonida oqibatni anglashi va tushunib yetishi, voyaga yetganlik hamda voyaga yetmasdan oldin muomala layoqatiga ega bo‘lish (emansipatsiya, qonunda nazarda tutilgan hollarda nikoh yoshiga yetmay turib oila qurish) holatlari batafsil yoritiladi. Huquq layoqati va muomala layoqati borasida olimlarning turlicha qarashlari solishtiriladi. Huquq layoqati bilan birgalikda muomala layoqatining mazmunini aks ettiruvchi unsurlar tahlil qilinadi. Bugungi kunda fuqarolik-huquqiy munosabatlarda jismoniy shaxs qanday holatda ishtirok etishi va qaysi ishtirok normal (odatiy) holat deb baholanishi borasida fikr yuritiladi. Fuqaroni muomala layoqati cheklangan yoki muomalaga layoqatsiz deb topish asoslari, ularning fuqarolik-huquqiy munosabatlarda ishtirok etish doirasi o‘rganiladi va xorijiy tajriba bilan qiyoslanadi. Normativ-huquqiy hujjatlardagi mavjud bo‘shliqlar va amaliyotdagi muammolarni bartaraf etish uchun asosli takliflar bildiriladi.