Mazkur maqolada aqli noraso yoki ruhiyati vaqtinchalik buzilgan shaxslar tomonidan ijtimoiy xavfli qilmish sodir etilganda, ularga nisbatan tibbiy yoʻsindagi majburlov choralarini qoʻllash boʻyicha qonunchilik va amaliyotda vujudga kelayotgan muammolar oʻrganilgan. Soʻnggi yillarda Oʻzbekiston sud-huquq tizimida amalga oshirilayotgan islohotlarga qaramasdan, tibbiy yoʻsindagi majburlov choralarini qoʻllash tartibi, uning aniq belgilab qo‘yilganligi, tibbiy yoʻsindagi majburlov choralari qoʻllanilayotgan shaxsning huquq va erkinliklarini taʼminlash yoʻlidagi ishlar e’tibordan chetda qolmoqda. Davlatimiz tomonidan “Inson qadri uchun” amalga oshirilayotgan islohotlar yoʻlida aqli noraso shaxslarni jamiyat hayotiga qaytarish, ularni davolash va ular tomonidan huquqbuzarlik hamda ijtimoiy xavfli qilmish sodir etilishining oldini olish eʼtibordan chetda qolmasligi va ushbu institutni qoʻllash tartibini takomillashtirish zarur. Mazkur muammolarni huquqiy tartibga solish uchun Oʻzbekistonning tibbiy yoʻsindagi majburlov choralarini qoʻllash sohasi va sogʻliqni saqlash tizimi qonunchiligini xalqaro talablarga moslashtirish hamda sud-huquq tizimi shaffofligini taʼminlash darkor. Muallif ushbu masalalarning huquqiy yechimini topishning asosiy yoʻnalishi qonunlar va huquqiy adabiyotlarga tibbiy yoʻsindagi majburlov choralarini qoʻllashning aniq chora-tadbirlari va tushunchalarini kiritish zarurligini ta’kidlaydi.